God stemning trass i dårleg ver
Laurdag 21. mai gjekk startskotet for dei to første samlingane i Keeperløftet Sunnfjord i regi av Anga FK. Samlingane hadde heile 38 påmelde og tilbakemeldingane er gode.
Godt oppmøte i rekruttering
Keeperløftet Sunnfjord Rekruttering er for framtidas keeperar i aldersgruppa 10-12 år. Heile 24 unge og lovande tok turen til Hafstadparken, der høgt kvalifiserte og motiverte trenarar tok imot dei. Det vart litt surt ver, og nokre vart litt kalde, men humøret og innsatsen var det ingenting å seie på. Keeperløftet registrerte berre gode tilbakemeldingar på opplegget frå utøvarane og foreldra som var der.
Fagleg godt opplegg i Keeperløftet
I Keeperløftet for aldersgruppa 13 og eldre var det i utgangspunktet 8 påmelde, men det kom heile 14 deltakarar. Ottar Klopstad leia også denne gruppa stødig gjennom eit flott fagleg opplegg, som ikkje sto tilbake for noko anna tilbod. Etter god oppvarming trena dei gjennom mange basis øvingar med tett oppfølging av trenarane. Det var fleire som var interesserte i ballkanonen «Gofoten», som også vart nytta i treninga.
Sogn og Fjordane fotballkrets var til stades
Per Einvald Aspevik, keeperansvarleg i fotballkretsen, var også positiv til både oppmøte og fagleg innhald. Han seier det er unikt å få samla så mange keeprar til slike samlingar, og han var full av lovord både om spelarane og opplegget.
Lista for det faglege nivået er lagt
Trenartemet bestående av Ottar Klopstad, Per Arne Nygård og Bjørn Andre Storøy har alle tre B lisens i tillegg til lang fartstid og god utdanning innan keeperområdet. Dette sikrar motiverte trenarar og god fagleg kvalitet i gjennomføringa. Keeperløftet har med dette lagt lista og synt kva kvalitet ein kan vente seg framover på samlingar.
Gledar oss til ferda vidare
Keeperløftet Sunnfjord i Anga FK vil takke trenarar, hjelparar og støtteapparat for ei flott samling. Det blir ei ny samling i gruppa 13+ i juni der vi kjem attende til stad og tid. I tillegg til samlingane vil Keeperløftet Sunnfjord vere imøtekommende til klubb-besøk i regionen for å bygge team og samarbeid.
